Aithníonn an tÚdarás an tábhacht a bhaineann le saothrú agus le léiriú na n-ealaíon mar chuid lárnach d'fhorbairt agus do chaomhnú phobail inmharthana Gaeltachta. Láidríodh an tacaíocht do na healaíona Gaeltachta tráth ar bunaíodh an chéad chomhpháirtíocht idir an dá eagraíocht i 1997 agus le hathnuachan na comhpháirtíochta sin i 2001 agus i 2004. Deis bhreise í seo chun dul chun cinn agus nuálaíocht a spreagadh sna healaíona sa Ghaeltacht agus an meas is dual dóibh a threisiú.

I rith tréimhse na comhpháirtíochta beidh an tÚdarás agus An Chomhairle Ealaíon ag díriú ar phríomhréimsí forbartha ealaíon i ngach ceantar Gaeltachta; ag dul i ngleic le laigeachtaí sa bhonneagar ealaíon agus ag cinntiú, i gcomhar leis an bpobal, agus le páirtithe leasmhara eile go mbeidh teacht ag an bpobal i gcoitinne ar ghnéithe de na healaíona dúchasacha agus comhaimseartha a bhí ceilte orthu go dtí seo."
Sorcha Nic Dhonncha, Údarás na Gaeltachta

"Tá rún daingin ag an gComhairle Ealaíon oibriú le húdaráis eile, lena chinntiú go mbíonn fáil ar na hEalaíona i gcroílár an phobail áitiúil. Sa Ghaeltacht, tá siad ag comhoibriú le hÚdarás na Gaeltachta ar fhorbairt na nEalaíon, ag dul i ngleic le laigeachtaí san infrastruchtúr ealaíon, agus ag cinntiú go bhfaigheann ealaíontóirí agus an pobal ina iomláine an tacaíocht atá riachtanach chun tionscnaimh ealaíon a fhorbairt."
Mary Cloake, An Chomhairle Ealaíon

Le linn 2003, eagraíodh cruinnithe sna ceantair Ghaeltachta leis na laigeachtaí agus na bearnaí i bhforbairt agus soláthar na n-ealaíon sa Ghaeltacht a aimsiú agus a phlé. Tugadh cuireadh d'ealaíontóirí, d'eagraíochtaí ealaíon, do ghrúpaí pobail agus don phobal i gcoitinne páirt a ghlacadh sna cruinnithe.

Tá an Plean Ealaíon 2005-2009 bunaithe ar na moltaí a d'eascair as na cruinnithe sin, ar an eolas a bailíodh mar chuid den Mheastóireacht a rinneadh ar an bPlean 2001-2003 agus ar thaithí na Foirne Ealaíon.

Ar ais go Barr