Eolas Fúinn
Is ar mhaithe le forbairt na nEalaíon Dúchasach agus Comhaimseartha sa Ghaeltacht a cuireadh tús le hEalaín na Gaeltachta, comhpháirtíocht idir Údarás na Gaeltachta agus An Chomhairle Ealaíon.
Cuireann Ealaín na Gaeltachta seirbhísí agus scéimeanna deontais ar fáil, a thacaíonn le forbairt eagraíochtaí ealaíona agus le healaíontóirí aonair.
Tar ag Obair Linn! Áisitheoir Ealaíon do Ghaeltacht Dhún na nGall (clúdach saoire mháithreachais)
Is é misean Ealaín na Gaeltachta (fochomhlacht de chuid Údarás na Gaeltachta) ná forbairt na n[1]ealaíon dúchasach agus comhaimseartha sa Ghaeltacht, agus is de réir Straitéis Ealaín na Gaeltachta 2023-2027 atáimid ag feidhmiú faoi láthair.
Beidh sé de phríomhchúram ar an té a cheapfar an clár oibre i dtaca leis seo a chur i bhfeidhm i nGaeltacht Dhún na nGall, mar aon le tacú le hobair eile na heagraíochta. Is post lánaimseartha é seo, ar chonradh cuspóra sheasta chun saoire mháithreachais a chlúdach.
Caithfear iarratas a dhéanamh roimh 4.00 i.n. ar an Céadaoin, 15 Aibreán, 2026.
Coimisiún ealaíon poiblí Champas Íosagáin á bhronnadh ar an scannánóir Mary Keane
Tá coimisiún nua á bhronnadh ag Údarás na Gaeltachta ar an scannánóir Mary Keane do thogra ealaíne pobail ar Champas Íosagáin. Beidh sí ag obair le pobal Mhúscraí, le hiarscoláirí Choláiste Íosagáin, agus i gcomhar leis an gcompántas rince clúiteach Teaċ Daṁsa ar scannán nua a fhorbairt, a shníomhann cuimhní, scéalta agus rince le chéile mar chomóradh ar oidhreacht Choláiste Íosagáin agus é á athfhorbairt don 21ú haois.
Tar éis breis agus 25 bliana den seancholáiste réamhullmhúcháin a bheith dúnta, d’fhógair Údarás na Gaeltachta togra mór athfhorbartha ar an seanfhoirgneamh mar lárionad nua forbartha fiontraíochta. Ré nua a bheidh ann don suíomh, ina mbeidh sé ag cothú uaillmhian, éirim agus spiorad fiontraíochta na Gaeltachta arís.
Is de thoradh próisis glaoigh oscailte a bronnadh an coimisiún. Cuireadh maoiniú de €68,000 ar fáil don togra seo ón gCiste um Athghiniúint agus Forbairt Tuaithe trí Scéim an Chéatadáin don Ealaín. Rinne Ealaín na Gaeltachta bainistíú ar an bpróiseas coimisiúnaithe ar son Údarás na Gaeltachta.
Tá Mary ag lorg ionchuir ó iarscoláirí an choláiste, bíodh siad i gcóngar nó i bhfad i gcéin.
Más mian leat do chuimhní faoi Choláiste Íosagáin a roinnt le Mary, déan teagmháil léi ar bosca.smaointe@mail.com nó 087 4443628
Ranganna sna healaíona dúchasacha i gConamara agus Árainn.
Tá áthas orainn clár ama Cuisle – clár sna healaíona dúchasacha don óige de chuid Ealaín na Gaeltachta – a sheoladh arís i mbliana. Cuireann Cuisle ranganna sa cheol traidisiúnta, na healaíona béil, damhsa agus amhránaíocht ar na sean-nós ar siúl i rith agus i ndiaidh am scoile i gConamara agus Árainn.
Tá buíochas mór ag dul do theagascóirí Cuisle as an obair mhór a dhéanann siad leis na gasúir ó bhliain go bliain, lena chinntiú go bhfuil na healaíona dúchasacha á gcoinneáil beo i measc óige na Gaeltachta.
Tá muid ag baint úsáide as córas nua clárúcháin i mbliana agus síleann muid go ndéanfaidh sé seo rudaí níos fusa dúinn go léir. Is é an córas Class For Kids atá in úsáid againn agus is éasca é a úsáid.
Le do ghasúr a chlárú ní gá ach cliceáil ar an nasc Clárúchán – CUISLE nó an Cód QR atá ar an gclár ama a scanadh agus a úsáid.
Féach ar an bhfíseán gearr anseo le treoir a fháil, más gá: Treoir maidir le Clárú ar Class For Kids.
N.B. Is gá íocaíocht a dhéanamh lena chinntiú go mbeidh do ghasúr cláraithe. Ní bheidh aon spás cinntithe go dtí go mbeidh an táille íoctha.
Tá clár Cuisle – clár óige Ealaín na Gaeltachta – arna mhaoiniú ag an Roinn Forbartha Tuaithe agus Pobail agus Gaeltachta.
